PRD: Áigut ásahit sámi mánáidforuma

Sámediggi áigu ásahit sámi mánáidforuma mas earret eará oadjebas digitála árgabeaivi lea oassin dan barggus.

Ođas | Almmuhuvvon

Sámediggi lea searvan Mánáidáittardeaddji alladási čoahkkimii dán vahkus, mii lea Mánáidáittardeaddji álgga váikkuhan dihtii guhkes áiggi ja oktiiordnejuvvon áŋgiruššama dan ektui ahte oččošeimmet oadjebas digitála árgabeaivvi mánáide ja nuoraide. Mánáidáittardeaddji háliida ahte áŋgiruššan galgá vuođđuduvvot mánáid vuoigatvuođaide mánáidkonvenšuvnna mielde ja oaidná man deaŧalaš lea ahte mánát ja nuorat leat mielde váikkuheamen dán barggus.

Sámediggi searvvai fárrolaga stuorradiggepresideanttain, stáhtaráđiiguin, stuorradiggepolitihkkariiguin ja mielde ledje maiddái badjel 30 eará almmolaš instánssa, organisašuvnna ja doaimma. Sii buohkat leat vuolláičállán oktasaš julggaštusa ja leat geatnegahttán iežaset čađahit unnimusat guokte doaibmabiju guhtege boahtte jagi.

Mikkel Eskil Mikkelsen underskriver erklæringen.jpg

Mikkel Eskil Mikkelsen underskriver erklæringen

Okta doaibmabijuin maid Sámediggi lea geatnegahttojuvvon bargat lea sámi mánáidforuma ásaheapmi man oktavuođas earret eará oadjebas digitála árgabeaivi lea oassin sin barggus. Sámediggeráđđi Mikkel Eskil Mikkelsen (NSR) vuolláičálii julggaštusa Sámedikki ovddas.

– Dál ii leat mis Sámedikkis makkárge arena gos digaštallat ja ságastallat mánáiguin ja nuoraiguin. Mii fertet ságastallat singuin, eat ge sin birra, go bargat suorggis mas sis lea ollu eanet máhttu ja vásihusat. Erenoamážit go bargat sin digitála árgabeaivvi ektui, árgabeaivvi ektui mas rávis olbmuin ii leat buorre oaidnit mainna sii rahčet, dadjá Mikkelsen.

Sámediggi áigu maiddái lágidit konferánssa givssideami birra, maiddái digitála givssideami birra, mii lea okta fáttáin. Konferánssas galgá leat bargobádji masa sámi mánát ja nuorat (mánáidforum) bovdejuvvojit searvat. Konferánssas lea fágalaš oassi rávis olbmuide geat barget mánáiguin ja eará áigeguovdilis aktevrraide.

– Sámediggái lea deaŧalaš bargat dan ovdii ahte buot mánát ja nuorat vásihit oadjebasvuođa ja searvvaheami buot arenain gos sii leat, leš dal fysalaš dahje digitála. Mii diehtit ahte sámi mánát ja nuorat dávjá vásihit vaššicealkámušaid, vaši ja vealaheami Norggas, árgabeaivi mii ii leat oadjebas. Mii diehtit ollu dán birra, ja mun áinnas háliidan bargat sámi mánáidforuma ásahemiin riikarájáid rastá oktan doaibmabidjun, dadjá Mikkelsen.

Sártnistis gesii son ovdan sitáhtaid digitála mediain main ledje rasisttalaš cealkámušat sámiid birra. Dat eai lean boarráset go guokte váhku boares sitáhtat, mat ledje vižžojuvvon sosiála mediain, dan oktavuođas go Girjáš sámečearru Ruoŧa bealde oaččui vuoigatvuođa hálddašit smávvafuođđobivddu ja guolástusa, ja man oktavuođas maŋŋá čájehuvvui vašši sámiid vuostá sosiála mediain ja main ledje ávžžuhusat goddit sámiid.

– Maŋimuš áiggis leat mii dađi bahábut oaidnán ollu rasisttalaš cealkámušaid ja leat oaidnán ahte vuortnuheaddji cealkámušat sámiid vuostá leat lassánan mediain ja erenoamážit neahttaságastallamat ja mat leat suorggahahtti ollu. Ja lea iešalddis čielga ášši ahte mii searvat dán deaŧalaš bargui, dadjá Mikkelsen.

Jearahallama addá ja gažaldagaide vástida sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!