PRD: Addá doarjaga šibitdállui

Sámediggeráđđi lea juolludan 300.000 ruvnno doarjjan Lise Kaldahl Skreddernesii Davvesiidda gielddas. Ruhta galgá mannat náveha stuorideapmái.

Ođas | Almmuhuvvon

Lise Kaldahl Skreddernes lea buvttadan mielkki ja bierggu šibitdálus Beahkkivuonas dan rájes go osttii dan 2001:s. Dál dáhpáhuvvá mielkebuvttadeapmi návehis mas leat hiŋgalat ja mii huksejuvvui 1979:s. Dat ii leat heivehuvvon dálááigge doibmii ja lea dárbu ođastit náveha. Návet ferte maid heivehuvvot boahtteáigásaš gáibádusaide dan ektui ahte oamit eai galgga leat šat hiŋgaliin.

37960859251_6dc84470db_n.jpg

Silje Karine Muotka (foto: Kenneth Hætta/Sámediggi)

Skreddernes lea dan dihte mearridan stuoridit náveha ja heivehit dan dasa ahte mielkegusat leat luovosin, eaige hiŋgaliin. Návet galgá maid stuoriduvvot vai lea ođđaáigásaš ja vai eastada dávddaid njoammumis omiide, ja galgá maid šaddat sierra kantuvra/boddolatnja ja stuoragievkkan, vai boahtteáiggis lea vejolašvuohta buvttadit ovdamearkka dihte vuosttá.

– Mii leat ilus go sáhttit doarjut viidáset ovdáneami šibitdálus, dadjá sámediggeráđđi Silje Karine Muotka.

Son sávvá ahte prošeakta dagahivččii ahte buvttadeapmi lassána fitnodagas, nu ahte bearraša bargosajit fitnodagas nannejuvvoše.

– Sávan maid ahte prošeakta dagaha stuorát árvohuksema Davvesiidda eanandollui, dadjá Muotka.

Sámediggeráđđi Silje Karine Muotka addá jearahallama ja vástida gažaldagaide, mob. +47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!