Kronihkka: Davvi Universitehtat njunnošis earenoamáš oahppofálaldagaiguin

Sámi buohccidivššároahpu ja sámi oahpaheaddjioahpu bokte ožžot guokte davimus universitehta nannoseabbo olggošgova ja čuožžovašvuođa, čállá sámediggeráđđi Mikkel Eskil Mikkelsen dán kronihkas.  

Ođas | Almmuhuvvon , ođasmahtton

Guokte davimus universitehta leat álggahan dahje leat pláneme sámi oahpuid. Davvi Universitehta lea bidjan johtui julevsámi ja lullisáme vuođđoskuvlaoahpaheaddjeoahpu, ja leat álggaheame sámi bargosadjevuođđuduvvon mánáidgárdeoahpaheaddjeoahpu. Romssa Universitehta ja Sámi allaskuvla leat pláneme sámi buohccidivššároahpu.  

IMG_E3509.JPG

Sámediggeráđđi Mikkel Eskil Mikkelsen

FOTO | Åse M.P. Pulk/Sámediggi

Dát leat stuora lávkkit stuora ja guovddáš sámi servodathástalusaid dustemis. Sihke skuvllain ja mánáidgárddiin váilot dál oahpaheaddjit geain lea sámegielgelbbolašvuohta. Sámediggái bohtet beaivválaččat dieđut mánáidgárddiin ja skuvllain hástalusaid birra sámi oahpaheaddjigelbbolašvuođa rekruteremis. Dat lea duođalaš hástalus min servodagas dál, muhto dobbelis oaidnit čovdosiid. Danne lea buorre ahte Davvi Universitehta lihkostuvvá oažžut oahpposaji sihke Bådådjos ja Lievenges/Levangeris sámi vuođđoskuvlaoahpaheaddjeoahpuide. 2016 ovttastupmi dagahii vejolažžan álggahit ja čađahit dakkár oahpu, ja dat lea mielddisbuktán buori ovdáneami Davvi Universitehta regionála čanastupmái lulli- ja julevsámi guvlui.  

Sámi buohccidivššároahpu ásaheapmi UiT:s ja Sámi allaskuvllas lea seamma dehálaš. Mearkkašan veara lea ahte ii leat buohccidivššároahppu mas lea veahá sámi sisdoallu, muhto sámi buohccidivššároahppu. Dat oahppu lea fálaldat stuora našuvnnalaš buohccidivššárdárbui, muhto das lea maiddái oppasámi dimenšuvdna mas lea vejolašvuohta rekruteret studeanttaid Ruoŧas ja Suomas.  

Seammás sámi buohccidivššároahpu bokte dego doahttaluvvo prinsihppa ahte sámi álbmogis lea geatnegasvuohta oažžut ovttaárvosaš dearvvašvuođabálvalusaid, ja vástida sámi álbmoga dárbbuide dearvvašvuođadilálašvuođas.  

Dát leat golbma stuora sámi oahppoásahusa mat ovttas dustejit stuora sámi servodatdárbbuid. Oahppoásahusat hábmejit dál iežaset olggošgova ja dahket iežaset relevántan iešlágán oahpuiguin, mat váikkuhit iešlágán gelbbolašvuođa riikkaidgaskasaš surggiin. Sámediggi háliida ovttas oahppoásahusaiguin ovdánahttit ja oččodit eanet sámi oahpuid. Mii háliidit gozihit ahte ásahuvvon struktuvrrat, lágat ja láhkaásahusat eai galgga hehttet sámi servodatdárbbuid čoavdima. Mii áigut váldit iežamet oasi ovddasvástádusas oahpuide rekruteremis stipeandaortnegiid bokte, ja árjjalaččat rekruteret joatkkaskuvlaohppiid.    

Sámediggeráđđin mun rámidan ásahusaid buori ja nanu barggu ovddas. Mun lean hui movttat go dát golbma ásahusa ovttasbarget, ja vuorddán gealdagasas boahttevaš sámi oahpuid sajáiduvvama. Seammás áigu Sámediggi čuovvulit oahppoásahusaid initiatiivva ahte evttohit bistevaš sámi ovddasteami universitehta stivrrain. Dat nanne universitehtaid regiovnnalaš sajádaga ja čalmmustahttá universitehtaid fátmmastanguovllu. Mii dárbbašit dakkár ásahusaid ja mii dárbbašit sin dáhtu dustet sámi servodatdárbbuid.  

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!