Illubeaivi bihtánsámi giellaservodahkii

Sámediggeráđđi Mikkel Eskil Mikkelsen háliida sávvat lihku bihtánsámi giellaservodahkii sihke Ruoŧa ja Norgga bealde go viimmat leat ožžon almmolaččat normerejuvvon čállingiela. Sámi giellariggodat nannejuvvo ja dát lea deaŧalaš dáhpáhus olles sámi servodahkii.

IMG_E3515.JPG

Ođas | Almmuhuvvon

– Otná beaivi lea illubeaivi. Sámegiella lea symbola min oktasašvuođas, min árbbis ja min báttiin min vánhemiidda. Giela bokte ahtanuššá identitehta ja gullevašvuohta, sorjjakeahttá guđe sámegiela máhttit dahje man unnán dahje man ollu mii máhttit gielaid, dadjá sámediggeráđđi Mikkel Eskil Mikkelsen. 

Sámediggeráđđi lea mielde bihtánsámi čállingiela almmuheames Silvermuseas Árjjatluovis, Ruoŧa bealde, gos čalmmusteapmi álgá dii. 15.00. Ruoŧa ja Norgga beale sámedikkit leat oaidná ahte lea dárbu normeret bihtánsámi čállingiela. Sámi parlamentáralaš ráđđi (SPR) attii normerenbarggu Sámi Giellagáldui, oktasaš davviriikkalaš fága- ja resursaguovddážii sámegielaid várás.

– Norgga beale Sámedikki ovddas háliidat mii giitit Sámi Giellagáldu bihtánsámi lávdegotti lahtuid, ja mun sávan olles bihtánsámi giellaservodahkii lihku. Mun doaivvun ahte buohkat geat geavahit bihtánsámegiela geavahišgohtet ođđa ortografiija, dadjá Mikkelsen.

Sámegielaid kárten

Sámedikkis lea erenoamáš ovddasvástádus ovdánahttit sámegielaid ja mihttomearrin lea ahte sámegielat gullojit, geavahuvvojit ja oidnojit servodagas. Sámedikki dievasčoahkkin mearridii juovlamánus 2018 Gïelelutnjeme/Giellalåpptim/Giellalokten – Sámedikki strategiijat sámegielaid várás, mii lea NAČ 2016:18 Váibmogiella čuovvuleapmi.

Giellaloktema bokte lea Sámediggi geatnegahttán iežas kártet dáláš dili ubmi-, bihtán- ja nuortalaš gielain, ja geahčadit guđe resurssat sáhtášedje váikkuhit dáid gielaid eanet geavaheami.

– Kárten addá midjiide buoret vuođu gielladoaibmabijuid álggaheapmái áigeguovdilis birrasiin, ja das oaidnit mii lea dahkkojuvvon ja vejolaš geainnut viidáset bargui ubmi-, bihtán- ja nuortalaš gielaid ealáskahttimis. Odne mii diehtit ahte bihtánsámegiella lea ođasmahttinproseassas Norgga bealde, dadjá Mikkelsen.

Sámediggeráđđi geassá ovdan dán barggu buorrin ovdamearkan mii čájeha manne lea deaŧalaš ja dárbbašlaš ovttasbargat giellanormerema ektui riikarájáid rastá.

– Vai sáhttá suodjalit ja ovddidit sámegielaid, de ferte čađahit fásta doaibmabijuid. Okta dákkár ovdamearka lea fásta normerenorgána ásaheapmi. Sámedikkiid mihttomearrin lea ásahit Sámi Giellagáldu oktasaš fásta normerenorgánan jagis 2020, dadjá Mikkelsen loahpas.

Jearahallama addá sámediggeráđđi Mikkel Eskil Mikkelsen, +47 917 42 161, mikkel.eskil.mikkelsen@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!