Doarjja nuoraidkonferánsii seksualitehta ja seksuála vearredaguid birra

Sámediggi addá 205.000 ru doarjjan Árran julevsáme guovdásjii Divttasvuonas lágidit nuoraidkonferánssa mii galgá rahpat gulahallama seksualitehta ja seksuála vearredaguid birra.

Ođas | Almmuhuvvon , ođasmahtton

Sámi nuoraidkonferánssa čađaheami bokte áigu Árran bidjat fuomášumi erenoamážit nuoraide maŋŋá Divttasvuona-ášši. Sii háliidit bidjat fokusa oadjebasvuhtii; oadjebasvuohta iežas rájiide, go lea eret Divttasvuonas, iežas identitehta go lea sápmelaš, čeavláivuohta iežas kultuvrras, árvvus, doaivvus ja jáhkus boahtteáigái.

DSC_3633.JPG

Sámediggeráđđi Mikkel Eskil Mikkelsen

– Arena nuoraide lea deaŧalaš, ja erenoamáš deaŧalaš lea háhkat arena gos nuorat sáhttet hábmet sihke sisdoalu ja fievrridit ságastallama. Mun lean hui ilus dán álgaga ektui, mii boahtá Árranis ja Doajmmasiebbre Julevsábme (DSJ), dadjá sámediggeráđđi Mikkel Eskil Mikkelsen.

Konferánssas galget leat áigeguovdilis fáttát, nugo bidjat rájáid, dat buorre mii lea seksualitehtas, ja movt atnit ávvira guđet guoimmisteamet, ja gokko mannet rájit irggástallama ja vealaheami gaskka. Konferánsa lea oassi prošeavttas Jasska/Trygg.

Deaŧalaš bealli dán konferánssas lea háliidus váikkuhit arenaid gos mánáid ja nuoraid identitehta nannejuvvo, aktivitehtaid lágideami bokte gos sámi giella ja kultuvra leat vuođđun, ja váikkuha oadjebasvuođa ja čeavláivuođa iežas sámi identitehtas.

– Sámediggi oaidná ahte dát lea deaŧalaš fáddá mii ovddiduvvo konferánssas. Divttasvuona-ášši maŋŋá báhce ollugiidda ollu gažaldagat, ja ollu fuones dovddut ja sii ledje suorganan sakka. Lea buorre go Árran háliida bidjat fokusa seksualitehtii ja seksuála vearredaguide fáddán, mas nuorat leat olahusjoavkun, dadjá sámediggeráđđi Mikkel Eskil Mikkelsen, ja sávvá Árranii lihku bargui viidáseappot.

Jearahallama addá dahje vástida gažaldagaide sámediggeráđđi Mikkel Eskil Mikkelsen, mob. 917 42 161

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!