Doarjja máttasámi giellaprošeavttaide

Sámediggeráđđi juolluda oktiibuot 600 000 ruvnno doarjjan guovtti máttasámi giellaprošektii.

1rådet (1).jpg
FOTO | Sámediggeráđđi/Sametingsrådet (Foto: Kenneth Hætta)

Ođas | Almmuhuvvon

Praahken skuvle/Brekken skole Rørosis oažžu 300 000 ruvnno doarjjan ásahit ja viidáset ovddidit sámegielat arenaid gos sámegiella geavahuvvo aktiivvalaččat. Dát galgá dahkkojuvvot golmma sámi giella- ja kulturčoagganeami bokte juohke skuvlajagis ohppiide geain lea gullevašvuohta rørossámi guvlui.

Čoagganemiin leat njálmmálaš ja geavatlaš doaimmat guovddážis, gos oasseváldit gulahallet sámegillii. Dát boahtá lassin dábálaš oahpahussii vuođđoskuvllas. Sámegielat arenaid háhkama bokte gos máttasámegiella geavahuvvo aktiivvalaččat lea ulbmilin nannet ja buoridit máttasámi geavaheami Røros-guovllus. Doaibmabijut čađahuvvojit Aajege Sámi giella- ja gelbbolašvuođa guovddážiin fárrolaga Rørosis.

Sámediggepresideantta Aili Keskitalo mielas leat giellaarenat deaŧalaččat, gos giella ja kultuvra ealáskahttojuvvo, suodjaluvvo ja nannejuvvo.

– Dat lea erenoamáš deaŧalaš Røros-guovllus, gos máttasámegielas eai leat makkárge lunddolaš arenat olggobealde almmolaš ásahusaid, dadjá Keskitalo.

Dasa lassin addá sámediggeráđđi lassejuolludusa 300 000 ruvnno Trøndelága fylkkasuohkanii Aajege Sámi giella- ja gelbbolašvuođa guovddáža bokte Rørosis «Saamastalledh» prošeavtta čađaheapmái, mii lea stuorra prošeakta mas guhtta máttasámi ásahusa barget ovttas.

Mihttomearrin lea metodaovddideapmi kommunikatiivvalaš giellaoahppamis, oahpparesurssaid ovddideapmi ja gelbbolašvuođa buorideapmi oahpaheddjiide geat oahpahit sámegielas.

Sámediggepresideantta mielas lea deaŧalaš doarjut máttasámi prošeavttaid.

– Erenoamáš deaŧalaš lea ahte máttasámi oahpponeavvut leat fidnemis, ahte ráhkaduvvojit vuogit giellaoahpahussii ja ahte gelbbolašvuohta oahpaheddjiid gaskkas loktejuvvo. Erenoamášvuohta «Saamastalledh» prošeavttas lea ahte dát lea ovttasbargu máŋgga máttasámi ásahusa gaskka, dadjá Keskitalo.

Jearahallama addá dahje vástida gažaldagaide sámediggepresideanta Aili Keskitalo.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!