Dearvvuođat Álttá suohkana ja Sámedikki gaskasaš ovttasbargošiehtadusa vuolláičállima oktavuođas

Dearvvuođat sámediggepresideanttas Aili Keskitalos ja sámediggeráđis Silje Karine Muotkas Álttá suohkana ja Sámedikki gaskasaš ovttasbargošiehtadusa vuolláičállima ja čalmmustahttima oktavuođas Álttás 25.03.19:

54727409_297048334526969_3414101629945774080_n.jpg

Ođas | Almmuhuvvon , ođasmahtton

Ráhkis álbmot. Áiggun álggahit dáinna lágiin, lihkku beivviin buohkaide, gratulerer med denne dagen til alle sammen.

Go odne lea mis veara ávvudit, mii leat ovttas joksan ođđa olahusa, Álttá suohkan ja Sámediggi leat odne ásahan ovttasbargošiehtadusa. Dáinna šiehtadusain mii čatnat Álttá suohkana ja Sámedikki ovttasráđiid bargat ovddidan dihte earret eará sámegiela, sámi báikenamaid, mánáidgárddiid, skuvllaid, dearvvašvuođa, sámi dáidaga ja sámi deaivvadanbáikki ektui.

Mii nannet iežamet verddevuođa mii lea bistán áiggiid čađa, man vuohttit historjjálaččat nugo sámi báikenamain Álttá guovllus. Dát šiehtadus láhčá, sihkarastá ja ovdánahttá sámiid dili Álttás. Dát dáhkida Álttá álbmogii ahte suohkana fálaldagat sápmelaččaide Álttás leat dehálaččat ja dat duođalaččat vuhtiiváldojuvvojit.

Historjá muitala ge midjiide ahte mis leat guhkes árbevierut ovttasráđiid bargat ja birget. Dát guovllut dán suohkanis; várit, ávžžit ja leagit, jogat ja mearragáttit, gilážat ja gávpotoasit Álttás, dain leat nu mo mii buohkat dovdat sámi namat. Stuora oassi Álttá álbmogis dovdet iežaset sápmelažžan, mearrasápmelažžan dahje leat sámi ja kvena máttut. Áltá lea maid okta dain stuorámus boazosámesuohkaniin, gos leat olles ovcci boazodoalloorohaga suohkan rájiid siskkobealde.

Dákkár vuolggasajiin mis lea buorre doaivva lihkostuvvat ovttasráđiid váldit vára dan sámevuođas. Njuovžilis giela ja ealli kultuvrra lea dehálaš doalahit. Dáppe lea oahpahus sámegielas ja sámi kultuvrras, mis leat doaibmi sámi searvvit, sámi giellaguovddáš ja nanu sámi kultuvra. Ja mis lea áigumuš ovttasbargguin velá eambbo nannet dáid. Dan dihte láhčit mii dál buoret dili bajásšaddamii daid boahttevaš buolvvaid giellaguddiide Álttá suohkanis, go ođđa sámi mánáidgárdi galgá ásahuvvot. Sámediggi rámida Álttá suohkana go leat jo čuovvulan dán šiehtadusa čuoggá ahte “ođđa sámi suohkanmánáidgárdi galgá gárvvis 2020”. Mii diehtit ahte dat lea ođđa sámi mánáidgárdi dán čakčii juo sajis. Dán ovddas gal ánssášehpet rámi! Juste dákkár ulbmiliid olaheapmái lea ge gielalaš ja kultuvrralaš máhttu man ferte háhkat ja doalahit.

Loahpalaččat áigut mii addit skeaŋkka Álttá suohkanii. Dá lea glássahearvvat mat čájehit sámi oktavuođa. De leaba “Aili” ja “Ailo” hámit maid Boble Glasshytte lea ráhkadan. Soai leaba čiŋadan Kárášjoga gávttiin. Mis lea maiddái girji Sámedikki birra vai dii bures oahpásmuvvabehtet minguin. Mii illudat go odne leat formaliseren iežamet verddevuođa ja sávvat buori ja mávssolaš ovttasbarggu.

Giitu fuomášumis!

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!