ILO, International Labour Organization, lea ON:a bargoeallima internationála sierraorganisašuvdna. ILO:s leat 185 miellahttostáhta. ILO soahpamuš nr. 169 álgoálbmoga ja čeardaálbmoga birra iehčanas stáhtain (ILO-169) mearriduvvui geassemánu 27. b. 1989:s ILO generálakonferánssas. ILO- 169 váldoprinsihppa lea álgoálbmogiid vuoigatvuohta gáhttet ja ovddidit iežaset kultuvrra, ja eiseválddiid geatnegasvuohta doarjut dán barggu doaibmabijuid bokte.

Norga lei vuosttaš riika mii ratifiserii soahpamuša geassemánu 20. b. 1990 stuoradiggemearrádusa vuođul, ja soahpamuš doaibmagođii čakčamánu 5. b. 1991:s. Dássážii leat 22 miellahttostáhta ratifiseren ILO-169. Eanas dáin leat Latiinna-Amerihká stáhtat. Eurohpás lea maid Danmárku, Spania ja Nederlánda ratifiseren dán soahpamuša.

Norgga ILO-169 raporteren ILO áššedovdilávdegoddái lea juohke 5. jagi. Ratifiserema oktavuođas celkkii ráđđehus ahte Sámedikkis galgá leat rolla bearráigeahččat movt soahpamuš geavahuvvo. Ráđđehus ja ILO soabaiga 1996:s ahte Sámediggi galgá beassat njuolga gulahallat ILO áššedovdilávdegottiin gos sáhttet ovddidit iežaset raporttaid dulkojumi ja soahpamuša doahttaleami birra. Danin raportere Sámediggi njuolga ILO áššedovdilávdegoddái ILO-169 birra seamma áigodaga go Norga, ja dát dagaha vejolažžan čuvget oaivilerohusaid mii gusto ILO-169 doahttaleapmái Norggas.

Norgga 6. raporta lea leamaš gulaskuddamis. Sámediggi háliida rabas ja čielga ságastallama sámi servodagain sámi servodatdili govvideami birra mii gusto servodathástalusaide, ja maid čovdosiidda masa mis lea eanemus dárbu. Dan ásahuvvon raporterenmekanismas, dákko bokte Sámedikki iehčanas raporteren ILO:i, lea dan dihte guovddáš mearkkašupmi. ILO rolla lea hirbmat bivnnut ja árvvusadnon dán proseassas.

Sámediggi bovde buktit cealkámušaid e-boastta bokte samediggi@samediggi.no. Merke cealkámuša “Sámedikki 2018 ILO-raporteren”. Sádde cealkámuša ovdal 15.06.18.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!